والعكس .........صحيح

امتى بتحس ان الايام كلها بقت شبه بعضها؟؟؟؟ احساس بايخ جدا مش كدة؟؟؟ انك تقوم من النوم وعارف يومك هيكون ازاى عارف اليوم بكل تفاصيله هتكلم نفس الناس وهتعمل نفس الحاجات ,روتين اكتر من منظم هتدخل على النت على نفس المواقع بتاعت كل يوم هتتفرج على نفس البرامج فى التليفزيون مع اختلاف بسيط فى الحاجات اللى هتشوفها لكن الفكرة واحدة كدة الايام ما بقتش شبه بعضها وبس لا بقت توائم هو ده الاحساس اللى لما يحيلك لازم تفكر وتغيره لان الروتين ده حاجة ماحدش يستحملها

عشان كدة قررت انى اجرب حاجة جديدة اسلوب من اختراعى للقضاء على الملل والفكرة بسيطة جدا وهى انك تعمل عكس كل اللى بتعمله مع الاحتفاظ بالحاجات الكويسة طبعا

مثلا نظام النوم واللى اعتقد ان معظم الناس بتتبعه فى الصيف وهو النظام الخفاشى بمعنى النوم بالنهار والسهر لوقت متأخر ممكن تغير النظام الخفاشى ده الى النظام العصافيرى تنام بدرى وتصحى بدرى وكمان الناس اللى بتكلمهم اديهم اجازة منك وكلم حد بقالك كتير مكلمتهوش والقنوات اللى بتتفرج عليها سبها شوية وشوف حاجات تانية اتفرج على اخبار مثلا بدل الافلام وهكذا ممكن الموضوع فى اوله يبقى غريب لكن التغيير مطلوب اكيد وطلما الاختلاف للاحسن يبقى ايه المانع؟؟؟

تتدور على الحاجات اللى ماكنتش تتصور انك تعملها وتجربها معظم الناس بتكسل تلعب رياضة او بطريقة اشيك ماعندهاش وقت للرياضة جرب هتخسر حاجة؟؟؟؟؟؟؟

انما بقى لو عاجبك حياتك زى ما هى بروتينها بسلطاتها بباباغنوجها يبقى زى مانت او تغير المحطة