هو احساس غريب بس انا شايفاه احساس منطقى جدا جدا جدا لكل اللى احنا فيه وكل اللى بيحصل حوالينا بين التدين الزائف والتدين الحقيقى بين العلم والجهل ...العلم اللى بجد واللى بيدعى انه عنده علم ...بين الطيبة والهبل....بين كل حاجة وكل حاجة برضه.....احيان كتير الشخص الواحد بيحس فى نفس الوقت انه متدين اوى وقريب من ربنا ولما يتكلم مع حد تانى المفروض انه متدين برضه وقريب من ربنا يكتشف ان كل اللى بيعمله غلط وفى حاجات حرام كمان نسبة الى الشخص اللى بيتكلم معاه...طيب مين فيهم صح الله اعلم...الناس اللى بتطلع على الفضائيات وتحلل وتحرم عادى كدة والناس غيرهم اللى بيطلعوا على لفضائيات ويقولوا عكس اللى الاولانيين كانوا بيقولوه...مين فيهم صح الله اعلم....كل شوية اقرى مقالة ويجيلى ايميلات كتير عن لبس الحجاب وخلع الحجاب ...مع انى كشخص من عامة المجتمع مقتنعة تماما بانه فرض زى مانا مقتنعة تماما بحاجات كتيرة جدا لكن انا مش عارفة هل ليا الحرية دلوقتى انى اقول ان الحجاب فرض ولا هيطلعولى مليون سبب عشان يقنعونى بالعكس...العملية مش حتت ايشارب البنت بتحطها على شعرها وخلاص تبقى كدة هى محجبة ومية مية, الحجاب اكبر من كدة بكتير لانى بترجم الحجاب لمجموعة افعال وسلوك....احساسى انى خايفة اتكلم فى معتقداتى بقى خطير عليا وعلى المجتمع كمان, بالنسبة كمان للموسيقى حرام وحلال حاجات وحاجات...مش انا ولا اى حد عادى اللى يقدر يقول حرام وحلال...لكن فيه حاجات فيها موسيقى بسيطة بحس انى لما اسمعها مش حرام ومش غلط...حاجات زى حمزة نمرة وبالاخص اغنية يارب...فى ناس بتحرم ده وناس تانية بتحلله انا فين فى النص بقى انا حاسة انى تايهه بين التدين الزائف والتدين اصلا...لما حد بينصح حد فى الدين على اساس ان النصيحة صح, الشخص التانى بيدخل معاه فى جدل ونقاش وهات ادلة وبقت العملية مش نصيحة بقت سباق مين يثبت انه صح...بجد والله ربنا يعافينا ويهدينا....حاجة كمان انا خايفة اتكلم عنها يمكن اخد بيها عقاب ولا حاجة...مؤخرا برنامج طونى خليفة استضاف مخرجة مشهورة قالت انها مش عاوزة تتحجب ودعت ربنا بكدة, اذا كانت بتدعى ربنا بالحرمان حتى هى حرة فى دعواتها لكن انا مش مواقفة على اللى هى قالته ومش موافقة على اعمالها اصلا وكمان مش مواقفة على طريقة الهجوم عليها واننا نتكلم عنها ونديها لقب كافرة...اسفة انا مش مواقفة على كدة ...يمكن ربنا يهديها وتتحجب كمان وتكون حد مختلف عن دلوقتى الله اعلم الناس هتموت على اى حال هى ما ماتتش على اللى هى فيه انسب حل ليها ربنا يهديها ونتجاهلها بقى, يعنى انا اصلا ما اتفرجتش على البرنامج فى التلفزيون وشفته كتيييييييييير اوى على النت انا عمرى ما كنت هعرف عنها اى حاجة لولا الاهتمام الزايد اوى بيها...لو اهتمينا احنا اصلا بحاجات تفيدنا او اهتمينا باسلام حد جديد احسن بكتير اوى من اننا نهتم بمعصية حد.
سؤال فضولى شوية للناس اللى بتتكلم ضد الحجاب هل احنا هنتضر لما البنات كلها تكون محجبات ولا هنتضر لما ما يكونوش محجبات؟؟انا مش عاوزة اجابة لكن عاوزة كل واحد يسأل نفسه مين افضل للمجتمع كمجتمع مش للبنات
السؤال اللى نفسى الاقى عليه اجابة انا فييييين؟؟؟؟فى كل دول انا فييييييييين؟؟؟
حتى لو انتوا مختلفين معايا فى كل اللى قلته وحتى لو كان كلامى كله غلط لكل الناس ياريت تسامحونى على جهلى وتدعولى ربنا يهدينى
بس.
ليست هناك تعليقات:
إرسال تعليق